За играта
Учиме емоции e eдукативна игра наменета за деца со потешкотии во социјалната интеракција и комуникацијата, пред се деца со нарушување од аутистичен спектар, но и други слични нарушувања.
Taa има за цел да им помогне на корисниците да научат да ги препознаваат и разликуваат основните човекови емоции и нивните соодветни лицеви изрази, како основа за развој на социо-комуникациските вештини.
Учиме емоции им овозможува на децата кои имаат потешкотии во „читање“ на емоциите од лице систематизирана и контролирана средина за учење на надворешните знаци за препознавање на основните емоционалните состојби (среќа, тага, лутина, страв).
Придобивки
Со континуирано користење на играта кај децата ги очекуваме следниве развојни придобивки:
- Развивање на способноста за препознавање на емоции од лицето.
- Формирање на генерализирана претстава за емоциите преку шематски цртежи (емотикони).
- Развивање на способноста за предвидување на емоциите во однос на ситуација или контекст.
- Развој на визуелно-перцептивните способности, особено зголемено фокусирање на вниманието на лицето, и тоа делот околу устата и очите, како носители на социјално важни информации.
Протокол
Протоколот предвидува користење на играта минимум 720 минути, со препорачано секојдневно користење на играта од околу 20тина минути, во период од 4-6 недели.
Обезбедивме таблет како награда за најмотивираниот корисник кој најбрзо ќе ги исполни предвидените 720 минути. (Кој веќе е доделен.)
Бидејќи оваа интервенција е во домашни услови, каде што детето се чувствува најсигурно и најопуштено, Вашата улога како родители се состои во помош околу одржување на вниманието и мотивацијата на детето за да остане фокусирано на играта. Овде помагаат позитивни поттикнувања, пофалби и секако награди како мотивација кои можат да бидат храна, омилени играчки, активности, или било што, што за вашето дете претставува задоволство и ќе го поттикне повторно да игра.